ඇයට නින්ද ගොස් ඇත.රාත්‍රියේ එක්වරම ඇය අවදි වී ඇඳ මත හිඳගෙන සිටියාය.ඇය නිසලව දෙසවන් යොමා සිටියද තම ගැහෙන හදවතෙහි රිද්මය විනා අන් කිසිවක් ඇයට ඇසුනේ නැත.මිනිත්තු කිහිපයක් ගෙවී ගියේය.එක්වරම ඇගේ කාමරයට කෙලින්ම පහලින් කිසියම් හඩක් ඇසෙන්නට විය.ඒ කිසියම් බරැති යමක් ගල් සහිත පොළව දිගේ පැසේජය හරහාද ඉන්පසු තරප්පුවේ පහළටත් ඇදගෙන යන හඩකි.ඇය ඇදෙන් බැස ජනේලය අසලට ගොස් එය මදක් විවර කලාය.සඳ එළියෙන් ඇයට ගෙවත්තෙහි නවතා තිබූ ගැල් පහක් දක්නට ලැබිණි.මින් තුනක් ආවරණය කර තිබූ ගැල් වූ අතර අනෙක් දෙක එසේ නොවීය.ඒ සෑම එකක්ම අශ්වයින් දෙදෙනෙකු විසින් ඇදගෙන යන වර්ගයේ ඒවා විය.මින් එක් ආවරණය කරන ලද ගැලක් ඇගේ ජනේලයට කෙලින්ම පහලින් නවතා තිබුනු අතර එහි බැඳ තිබූ අශ්වයින්ගේ උණුසුම් ශරීර වලින් දහඩිය වලා පිටවන්නට විය. එම ගැල් වටා එක්ව සිටි සමහරක් මිනිසුන් එම සවස් කාලයේ තැබෑරුමෙහි බීමතින් සිටි වුන් විය.මීට අමතරව ගෙවත්තෙහි මේරි විසින කිසිදා දැක නොමැති පිටස්තර මිනිසුන්ද විය.
ඇය මෙලෙස බලාසිටින අතරතුර මේ සියල්ල තේරුම් ගැනීමට උත්සහ කලාය.එසේනම් මෙම ගැල් වලින් ප්‍රවාහනය කරන ලද පෙට්ටි හා පාර්සල් ජැමේයිකා තානයමේහිදී ගොඩ බා තැන්පත් කරගන්නවා විය යුතුය.ඒවා එහි තිබූ අගුල් දමන ලද කාමරයෙහි ගබඩා කර තබයි.මේ සෑම දෙයක්ම සම්පූර්ණ නිෂ්ෂ්‍යබ්දතාවයෙන් යුතුව සිදුකරන ලදි.සැදෑකාලයේ තැබෑරුමෙහි සිංදු කියමින් හා කෑකෝගසමින් සිටි මෙම මිනිසුන් දැන් නිහඬ බැරෑරුම් ස්වභවයකට පත්ව සිටියේ ඔවුන්ගේ රැකියාවට පූර්ණ අවධානය යොමුකරමින්ය.
ජොස් මර්ලින් ඉදිරිපස දොරටුව අසලට පැමිණියේය. ඔහු අසලින් සිටගෙන සිටියේ එම සැදෑවේ ඇය දුටු තොරොම්බල්කරුවායි.
"එච්චරයිද තියෙන්නෙ?" ඔහු මෘදුව ඇසුවේය.
එවිට එම අවසන් ගැලේහි රියදුරා එය එසේ බවට අත ඔසවා සන් කලේය.ඉතින් එම ගැල් රථ ජැමෙයිකා තානායමෙන් ඉවතට ගමන් කරන්නට විය.ගෙවත්තෙන් ඉවතට එකා පසුපස එකා පැමිණි ඒවා මහා මාර්ගයට පැමිණි පසු උතුරු දෙසටත් දකුණු දෙසටත් හැරී අවසන් ගැලත් ඇගේ දෑස් මානයෙන් නොපෙනී යනතුරු ගමන් කරන්නට විය.ගෙවත්තෙහි දැන් සිටගෙන සිටියේ මේරි මින් පෙරි දැක නැති මිනිසෙකුත් තොරොම්බල් කරුවාත් ජැමෙයිකා තානායමෙහි තානායම්කරුවාත් පමණි.ඉන් මොහොතකට පසු ඔවුනුත් හැරී නිවස තුලට ගමන් කලෝය.ඔවුන් පැසේජය දිගේ ගමන් කොට තැබෑරුමට වැදී එහි දොර වසා දමනු මේරිට ඇසුණි.දැන් ශාලාවෙහි තිබූ විශාල ඔරලෝසුවේ රාත්‍රී 3 වදින නාදය විනා එහි වෙනත් කිසිඳු ශබ්දයක් නොවීය.
මේරි ජනේලය අසලින් ඉවත්ව ඇගේ ඇඳ මත හිඳගත්තාය.සීතල සුලඟ ඇගේ උරහිසේ ඇට මිදුලු පසා කරගෙන යෑම නිසා ඇය සීතලෙන් වෙවුලන්නට විය.එසේ නම් මෙය මහා පරිමාණයෙන් සිදුවන හොර බඩු ජාවාරමකි.ජොස් මෙර්ලින්ට මෙවන් ජාවාරමක් හැසිරවීමට අවශ්‍ය බුද්ධිය හා දක්ෂතාව තිබේද?එසේ නම් ඔහු පසුගිය සතිය මුළුල්ලේම නිවසින් බැහැරව අද මෙහි සිදුවන මෙම හොර බඩු ප්‍රවාහනයට අදාල පහසුකම් සූදානම් කරමින් සිටියේද?ඔහුගේ සහචරයින් වන මෙම වනචාරි පෙනුමෙන් යුතු මිනිසුන් ක්‍රමානුකූලව හා ප්‍රවේසමින් තෝරාගන්නට ඇත්තේ ඔවුන්ගේ පෙනුම සැලකිල්ලට නොගෙන විය හැක.මෙතරක් කලක් නීතීයේ රැහැනට හසු නොවී සිටීමට නම් ඔහු මෙම සමස්ථ ජාවාරමම සීරුවෙන් පාලනය කරමින් සිටිනවා විය යුතුය.මෙවන් හොර බඩු ජාවාරමක් පිළිබද ඉව වටුණු ඕනෑම මහෙස්ත්‍රාත් වරයෙකු මෙම තානායම පිළිබඳව සැක කරනු නිසැකය.එහෙත් ඒ ඔහුත් මෙම ජාවාරමේ හවුල්කරුවෙකු නොවනවානම් පමණි!!
ඇගේ පුංචි අම්මා නොවන්නට ඇය වහාම මෙම තානායමෙන් පිටව ගොස් ආසන්නම නගරය සොයා ගොස් ජොස් මෙර්ලින් පිලිබඳ තතු හෙලි කරනු නිසැකය.එවිට ඔහු හා ඔහුගේ සගයන් සියල්ලෝම බන්ධනාගාරගත වනු ඇති අතර මෙම ජාවාරමට නැවතීමේ තිත තැබෙනු ඇත.
එහෙත් ඇය තවමත් දැක ඇත්තේ මෙම ජාවාරමෙහි එක් පැතිකඩක් පමණද?මෙහි වන තවත් බොහෝ දෑ ඇයට දැනගැනීමට ඇත්ද? ඇයට පෙරදිනක තම පුංචි අම්මාගේ දෑසෙහි දුටු භීතිය සිහියට පැමිණි අතර එදා මුලුතැන්ගෙයි දොර පිටිපස සිට පොළව දිගේ ඇදුනු සෙවණැලි දෙස බලමින් ඇය තෙපලූ වදන් ඇයට සිහි විය.
" මේරි,මේ ජැමෙයිකා තානායමේ ගොඩක් දේවල් සිද්ධ වෙනවා.ඒ ගැන වචනයක් වත් පිට කරන්න හිතන්න වත් බැරි විදියේ දේවල්.ගොඩක් නරක,දුශ්ඨ දේවල්. මට ඒව ඔයාට කවදාවත් කියන්න බෑ.මම තාම ඒවා මෙහෙ සිද්ධ වෙනවා කියල පිළිගන්න වත් ලෑස්ති නෑ"
-------------මතු සම්බන්ධයි---------------
No comments:
Post a Comment