එක්වරම දොරෙන් එපිට සිට අඩි ශබ්දයක් ඇසුනු අතර මේරිගේ හදවත කිඳා බැස්සේය.ජොස් බාප්පා පහත මාලය පැමිණ ඇත.ඔහු කාමරයට පැමිණ මේරි දෙසත් පුංචි අම්මා දෙසත් මාරුවෙන් මාරුවට බලන්නට විය.ඉන්පසු බිත්තිය අසල තිබූ පුටුවක් ඇදගත් ඔහු එය මේසය දෙසට තල්ලු කලෙන් හඩ නංවමින් පුටුව මේසයේ වැදිනි.ඉන්පසු ඔහුගේ විශාල කය අසුන දෙසට පහත් කල ඔහු මේරිව මේසයට කැඳවන්නටත් ප්‍රථම පාන් ගෙඩියක් ගෙන ඉන් විශාල කොටසක් කපා මුවට දමා ගත්තේය.
"ඔයාට හොද කෑම වේලක් ඕනා.මට පේනවා"කී ඔහු පරෙස්සමින් පාන් ගෙඩියක බටර් තවරන්නට විය.
ඉන් සිහින් පෙත්තක් කැපූ ඔහු ඇය සදහා එය නැවතත් කොටස් හතරකට කැපුවේය.ඔහු එම කාර්යය කොතරම් සියුම්ව,ඔහු ඔහුටම පිළිගන්වා ගත් අයුරට වඩා හාත්පස වෙනස් අයුරකින් හා සන්සුන්ව කලේද යත් ඔහුගේ එම රළු බවින් සන්සුන් බවට වෙනස් වීම මේරිට මහත් භීතියක් ඇති කලේය.
ඔහුගේ ඇඟිලි සතුවූ යම් අත්භූත බලයකින් අසුරු සැනින් එවා දක්ෂ සේවකයින් පිරිසක් බවට පත්කල සෙයකි.
"පේශන්ස්" ඔහු කීවේය. "මෙන්න මේ යතුර අරන් ගිහින් මට බෝතලයක් අරන් එනවා.දෙයියන්ගේ නාමෙට!! මට පුදුම තිබහක් තියෙන්නේ."
මද වේලාවකට පසු මත්පැන් බදුනක් අතින් ගෙන එහි ආ ඔහුගේ බිරිඳ එය ඔහු ඉදිරිපිට තැබුවාය.
ඇය ආහාර පිස අවසන් කොට එවා මේරිට හා තමාට පිළිගන්වන අතරතුර ඔහු මේසයේ එක් පාදයකට පයින් පහර දෙමින් මත්පැන් පානය කරන්නට විය. එක්වරම ඔහු ඔහුගේ මිටි කල අතෙන් මේසය මැදට පහරක් එල්ල කලේය.එහි වූ පිඟන් කෝප්ප දෙදරන්නට විය.එක් බදුනක් මේසයෙන් පෙරලී විත් කැබලි වලට බිදී ගියේ මහ හඩක් නංවමිනි.
"මම තමුන්ට එකක් කියන්නම්,මේරි යෙලන්" ඔහු කෑගසුවේය.
"මම තමා මේ ගෙදර ප්‍රධානියා.ඒක තමුන් හොදට මතක තියාගන්න.ඔයා වැඩ කරන්න ඕනි මම කියන විදියටයි.ගෙදර වැඩට උදවු වෙලා තැබෑරුමේ වැඩ ටික කරන්න ඕන.එතකොට මම තමුන්ට ඇඟිල්ලක් වත් තියන්නෙ නෑ.ඒත් දෙයියන්ගේ නාමෙට තමුන් කට වහන් හිටියෙ නැත්තන් මගෙන් හොදට ගුටි බැට හම්බවෙයි.හොදට මට්ටු වෙනකල්.හරියට මේ ඔයාගේ පුංචි අම්මා වගේ"
මේරි මේසයේ අනෙක් පස සිට ඔහු දෙස බලා සිටියාය.ඇය ඇගේ දෙ අත් මේසයේ යටින් තබාගෙන සිටියේ එවා වෙවුලන අයුරු ඔහුට දැකගත නොහැකි වන අයුරෙනි.
"මට තේරෙනවා" ඇය කීවාය."මට වැඩක් නෑ ඔයා මේ තානායම ඇතුලෙ මොනවා කලත්.මම මෙහෙ තියන වැඩක් කරගෙන ඉන්නම්.මම මගේ ගැන කිසිම දොසක් කියන්න ඔයාට ඉඩ තියන්නේ නෑ.
ඒත් ඔයා මගේ පුංචි අම්මාව මොන විදියෙන් හරි රිදෙව්වොත්,මම මෙන්න මේ ටික කියන්නම්-මම ජැමෙයිකා තානායම අතඇරලා යනවා.ගිහින් හොයාගෙන එනවා මහේස්ත්‍රාත් කෙනෙක්.එයාව මෙහෙට එක්කන් ඇවිත් ඔයාව නීතිය ඉදිරියට ගේනවා.ඊට පස්සෙ ඔයාට පුලුවන්නම් මට ගුටි බැට දෙන්නකො."
මේරි සුදුමැලි වූ මුහුනින් යුතුව එහි හිද සිටියාය.ඇය දැන නොසිටියත් ඇය විසින් ඇයවම මේ මිනිසාගෙන් ගලවාගෙන තිබිනි.ඇය සතු ධෛර්යය විදහාලන මෙම කතාව මෙම මිනිසා තුල මහත් බලපෑමක් ඇති කිරීමට සමත් වී තිබිනි.ඔහු පුටුවේ පසුපසට හොඳින් හේත්තු වෙමින් තමාව සන්සුන් කරගත්තේය.
"ඒක හරිම හොඳයි" ඔහු කීවේය.
"හරි ලස්සනට කිව්වා ඒ ටික.දැන් අපි දන්නවා මොන වගේ අමුත්තෙක්ද මේ කියලා.එයාව තරහ ගැස්සුවොත් එයා දත් විලිස්සනවා.හරි ලමයා.ඔයයි මමයි මම හිතුවට වඩා සෑහෙන්න එක වගේ."
අපි මේ සෙල්ලම, කරනවා නම් එකට කරමු.මට කවදාහරි දවසක ඔයාට මේ ජැමෙයිකා තානායමේ රස්සාවක් දෙන්න පුලුවන් වෙයි.ඔයා කවදාවත් නොකරපු විදියේ රස්සාවක්! මේරි යෙලන්.ජීවිතයත් මරණ්යත් අතර සෙල්ලම් කරන රස්සාවක්!.පිරිමි කරන රස්සාවක් මේරි යෙලන්!"
මේරිට ඇගේ පිටුපසින් පුංචි අම්මාගේ සිහින් කෑගැසීමක් ඇසිනි.
"අනේ ජොස්" ඇය කෙඳිරුවාය."අනේ ජොස් කරුණාකරලා"
ඇගේ කටහඩෙහි ගැබ්ව තිබූ මහත්වූ භීතිය හා සන්ත්‍රාසය හදුනාගත් මේරි ඇය දෙස පුදුමයෙන් බැලුවාය.
ඇගේ බාප්පා එවිට සිය අත නොසැලකිලිමත් ලෙස වනමින් "ඇදට යනවා පේශන්ස්"යි කීවේය.
"මට ඔයාගේ ජරා මූණ කෑම මේසෙදි දැකලම එපා වෙලා.මේ කෙල්ලයි මමයි අපි දෙන්නව හොදට තේරුම් ගත්තා"
කාන්තාව එකෙණෙහිම නැගිට දොර වෙත ගියාය.උරහිසට උඩින් බලමින් අවසන් අසරණ බැල්මත් ඔහු වෙත යොමු කල ඇය උඩුමහලට නැග්ගාය. ජොස් මර්ලින් සහ මේරි අවසානයේ එහි තනි විය.අතේ තිබූ හිස් වීදුරුව ඉවතට තල්ලු කල ඔහු මේසය මතින් දෑත් බැදගත්තේය.
"මගේ ජීවිතේ එක දුර්වලකමක් තියනවා.මම ඔයාට කියන්නම් ඒ මොකද්ද කියලා.ඒ තමයි මේ බෝතලේ.ඒක සාපයක් කියල මම දන්නවා.මට මාවම නතර කරගන්න බෑ.එක දවසක ඒක මගේ අවසානය වෙයි.ඒත් එකෙන් හොදක් නම් සිද්ධවෙයි.
සමහර කාලවල් වලට මම මේවායින් එක බිනංදුවකට වඩා අත වත් තියන්නේ නෑ...ඒත් අන්තිමට මට මහා තිබහක් දැනෙනවා- එතකොට මම බොනවා බොනවා පැය ගානක් තිස්සේ.ඊට පස්සෙ මම කියවනවා මම කරපු හැමදෙයක්ම කියල ඉවර වෙනකල්ම.මේ හතර මායිමේ ඉන්න හැමෝම දැනගන්නකල්...
මම මේව කියන්නේ මම දැනටමත් ඕනවට වඩා බීල නිසයි.දැන් මට මගේ කට පරිස්සම් කරගන්න බැරි නිසයි.ඒ කොහොම උනත් මම මගේ ඔලුව පාලනය කරගන්න දන්නවා.මම ඇයි මේ මූසල ගෙදරට වෙලා මේක අයිති කරගෙන ඉන්නේ කියලා කියන්න තරම් මම තාම බීල වැඩි උනේ නම් නෑ."
ඔහු හඬ බාල කොට කෙඳිරිල්ලක් තරම් වූ හඬකින් කියන්නට විය.ගිනි උඳුන නිවී යමින් පැවතුන අතර අඳුරු සෙවණැලි දිගු ඇඟිලි මෙන් බිත්තිය මත පතිත වි තිබිනි.මේසය මත වූ මලානික එළිය, ජොස් මර්ලින්ගේ විශාල විරූපි සෙවනැල්ලක් සිවිලිම මත මවන්නට විය.
No comments:
Post a Comment